Үөхпүтүттэн кыһыйан моонньуга быһаҕынан анньыбыт

Бүлүү улууһун борокуратуурата 61 саастаах олохтооххо тэриллибит холуобунай дьыала буруйдуур түмүгүн бигэргэттэ. Эр киһи Арассыыйа Холуобунай кодексатын 105-с ыстатыйатын 1-кы чааһынан (киһини өлөрүү) буруйданар.

Силиэстийэ көрдөрөрүнэн, бу дьыл бэс ыйыгар Уһун сэлиэнньэтин биир кыбартыыратыгар буруйданааччы эмсэҕэлээччини кытта бииргэ арыгылаабыт. Ол олорон эр дьон иирсэн туран кэлбиттэр, этиһии тахсыбыт. Бииргэ иһэр киһитэ кинини үөхпүтүттэн кыһыйан, буруйданааччы утарылаһааччытын моонньуга быһаҕынан анньыбыт. Ылбыт ыарахан бааһыттан эр киһи тутатына өлбүт.

«Холуобунай дьыаланы Арассыыйа Силиэстийэлиир кэмитиэтин Саха сиринээҕи Бүлүүтээҕи улуустар икки ардыларынааҕы отдела чинчийэн бүтэрэн, суукка ыытта», — диэн өрөспүүбүлүкэ борокуратууратын пресс-сулууспата иһитиннэрэр.