Үөрдүбүт, астынныбыт, махтанабыт!

Үөрэммит оскуолабытын бүтэрбиппит 50 сылынан, Тиһэх чуораан бырааһынньыгар ыҥырыллан тиийэн, 20 буолан көрсөн, астынан, дуоһуйан, оскуола кэлэктиибигэр (дириэктэр Афанасьева Л.А., дириэктэри үөрэх чааһыгар солбуйааччы Седалищева Е. И.,  иитэр үлэҕэ солбуйааччы Макарова В.В.) сүҥкэн  улахан махталбытын тиэрдэбит.

Тиийээппитин кытта үөрэ-көтө көрсөн, оскуола таһыттан экскурсиялаан, оскуола таһа да,  иһэ да наһаа үчүгэй тупсаҕай оҥоһуулааҕын, араас элбэх оскуола устуоруйатын, олоҕун кэпсиир истиэндэлэри астына көрдүбүт.  3-с кылаас оҕолоруттан саҕалаан,  интэриэһинэйдик кэпсииллэрин, хас истиэндэ аайы биир дойдулаахпыт,  норуодунай суруйааччы  Н.Е. Мординов- Амма Аччыгыйын билиигэ, олоххо кынаттыыр тылларын оҕолор киэн тутта этэллэрин, учууталлар оҕолору Амма Аччыгыйын үлэлэринэн иитэллэрин  бэлиэтээтибит.

Салгыы актовай саалаҕа үөрүүлээх  чааска уруйданныбыт-айхалланныбыт, бэлэх   туттубут, өйдөбүнньүк хаалларынныбыт. Онтон  Блахирова В.В ыҥырыытынан мусуойга тиийэн, оскуолатааҕы тэтэрээккэ үлэлэрбитин, кылаас рапортарын, ханна, хаһан туохха ситиһиилэммиппит тиһиллэ сылдьар паапкаларын уо.д.а биһиги кылаас үлэтин, ситиһиитин туоһулуур матырыйааллар тэлгэммиттэрин долгуйа көрдүбүт, оҕо сааспытын санаатыбыт. Мусуой  хоһо кыра да буоллар,  толору салаа-салаа кыстанан турар  матырыйааллааҕын көрөн,  баайын сөхтүбүт.

Быйыл оскуоланы бүтэрээччилэр кылаастарын чаастарыгар кыттыыны ыллыбыт.  Кинилэри  олус иллээх, барыга-бары көхтөөх, билиигэ-көрүүгэ тардыһыылаах оҕолор эбит диэн бэлиэтии көрдүбүт уонна дьоһун дьон буолан тахсалларыгар эрэннибит. Ол кэннэ буфетка биһиэхэ анаан тэриллибит мааны астаах остуолга учууталлары кытта көрүстүбүт, салгыы ирэ-хоро оскуолатааҕы сылларбытын кэпсэтэн,  оҕо сааспытыгар түһэн ыллыбыт. Ол курдук,  сарсыарда 9.30 саҕалаан киэһээ 17.30 диэри бириэмэ ырааппытын билбэккэ да хааллыбыт. Маннык истиҥ көрсүһүүнү үрдүк таһымҥа тэрийбит оскуола кэлэктиибигэр ис сүрэхтэн махтанабыт.

Үлэҕитигэр   ситиһиилэри уонна  үөрэнээччилэргит ситиһиилэрэ өссө да элбии турарыгар баҕарабыт.

Төһө да оскуола аанын сабан таҕыстарбыт, ол түгэни  санаан кэлэн кэпсэтэбит, оннук өр кэмҥэ салҕанара буолуо дии саныыбыт. Баһыыба үөрэммит оскуолабыт, билигин үлэлии олорор кэлэктиип!

1976 сыллаахха Харбалаах орто оскуолатын бүтэрбиттэр