Үһүс оҕоҕо — биир мөлүйүөн солкуобай

Норуот дьокутаата Алена Атласова кулун тутар 23 күнүгэр Судаарыстыбаннай Дуума кыра саалатыгар видео-кэмпириэнсийэ нөҥүө элбэх оҕолоох ыалларга судаарыстыбаннай бэлиитикэни олоххо киллэриигэ анаммыт парламент истиилэригэр кытынна, диэн Ил Түмэн пресс-сулууспата иһитиннэрэр.

Тэрээһин Арассыыйа Бэрэсидьиэнин 2024 сыл тохсунньу 23 күнүнээҕи 63 №-дээх “Элбэх оҕолоох ыаллары социальнай өттүнэн өйүүр дьаһаллар тустарынан” ыйааҕа Арассыыйа эрэгийиэннэригэр хайдах толоруллубутун кэтээн көрүүгэ ананна. Дьүүллэһии кэмигэр билигин баар өйөбүл дьаһалларын көдьүүһэ, ону тэҥэ элбэх оҕолоох ыалларга сыһыаннаах судаарыстыбаннай бэлиитикэни тупсарыы боппуруостара көрүлүннүлэр.

Сүрүн дакылааты Судаарыстыбаннай Дуума кэмитиэтин бэрэссэдээтэлэ Нина Останина оҥордо. Кини бэлиэтээбитинэн, билигин Арассыыйаҕа 3 мөлүйүөн кэриҥэ элбэх оҕолоох ыал олорор, онно 9,5 мөлүйүөн оҕо иитиллэр. Ол эрээри, Росстат дааннайынан, хас бэһис элбэх оҕолоох ыал, эбэтэр 600 тыһыынча кэриҥэ дьиэ кэргэн, дьадаҥы буолуу кэрдииһин аннынан олорор.

Маныаха кэмитиэт бэрэссэдээтэлэ ийэ хапытаалыгар сыһыаны уларытарга, төлөбүр кээмэйин ыалга хас оҕо баарыттан тутулуктаах оҥорорго этии киллэрдэ. Ону таһынан, федеральнай өйөбүл дьаһалларын, дохуоттарын таһымын учуоттаабакка эрэ (наадыйалларын-наадыйбаттарын ирдээбэккэ), бары элбэх оҕолоох ыалларга тарҕатар наадатын ыйда.

Парламент истиилэрин түмүгүнэн этиилэр киирэн, бүтэһиктээх сүбэ-ама оҥоһулунна. Ол курдук, Уһук Илин уонна Арктика сайдыытыгар кэмитиэт бэрэссэдээтэлэ, КПРФ фракциятын чилиэнэ Николай Харитонов Саха Өрөспүүбүлүкэтин Ил Түмэнин этиитин иһитиннэрдэ. Бу этиигэ — үһүс уонна онтон салгыы оҕо төрөөтөҕүнэ 1 мөлүйүөн солкуобайы төлүүр пилотнай бырайыагы Уһук Илин бары эрэгийиэннэригэр тарҕатар туһунан туруорсуу киирдэ.

Маны олоххо киллэрэр туһугар Уһук Илиннээҕи федеральнай уокурук эрэгийиэннэригэр бэриллэр федеральнай субсидия быраабылаларыгар уларытыылары киллэрэр ирдэнэр. Бу субсидиялар ипотеканан дьиэ-уот кирэдьиитин сабарга анаммыт судаарыстыба өйөбүлүн кээмэйин 450 тыһыынчаттан 1 мөлүйүөн солкуобайга диэри улаатыннарарга (тэҥҥэ үбүлээһиҥҥэ) ананаллар.