Ыйыт-хоруйдуубут: атын үлэһити ыҥырбыппыт сөп дуо?

Ааҕааччыбыт ыйытыытыгар СӨ Идэлээх сойууһун федерациятын үлэҕэ быраап өттүнэн иниспиэксийэтин салайааччыта, СӨ үтүөлээх юриһа Наталья Ивановна Барковская хоруйун таһаарабыт.

Атын үлэһити ыҥырбыппыт сөп дуо?

— Тэрилтэбитигэр үлэлиир дьахтар тус баҕатынан уурайарын туһунан сайабылыанньа биэрбитэ. Онтон үс хонон баран кини уурайбаппын диэн сайабылыанньатын төттөрү көрдөөбүтэ. Ол эрээри, биһиги киниэхэ аккаастаабыппыт. Тоҕо диэтэххэ, кини миэстэтигэр үлэтиттэн уурайа илик атын үлэһити ыҥырбыппыт. Бу түгэҥҥэ биһиги сөпкө гынныбыт дуо?

Бу ыйытыыга СӨ Идэлээх сойууһун федерациятын үлэҕэ быраап өттүнэн иниспиэксийэтин салайааччыта, СӨ үтүөлээх юриһа Наталья Ивановна Барковская маннык хоруйдаата:

— Эһиги үлэһиккит РФ Үлэҕэ кодексын 80 ыст. 4 ч. бэриллибит быраабынан туһаммыт. Онно олоҕуран уурайарын туһунан сэрэтэр болдьоҕо бүтүөр диэри үлэһит ханнык баҕарар кэмҥэ сайабылыанньатын төттөрү ылар кыахтаах. Бу түгэҥҥэ ууратыллыбат, өскөтүн кини миэстэтигэр суругунан көрүҥүнэн атын үлэһит ыҥырыллыбатах буоллаҕына. Киниэхэ РФ Үлэҕэ кодексыгар уонна атын федеральнай сокуоннарга олоҕуран, үлэ дуогабарын түһэрсиигэ кыайан аккаастаныллыбат.

РФ Үлэҕэ кодексын 64 ыстатыйатын 4 чааһынан, атын үлэни биэрээччиттэн көһөрүү бэрээдэгинэн суругунан көрүҥүнэн үлэҕэ ыҥырыллыбыт үлэһиттэргэ үлэ дуогабарын түһэрсиигэ аккаастыыр бобуллар.

Бу туһунан өссө “О применении судами Российской Федерации Трудового кодекса Российской Федерации” РФ Үрдүкү Суутун 2004 сыл кулун тутар 17 күнүнээҕи 2 нүөмэрдээх (2025 сыл 09.12 эрэдээксийэ) уурааҕын 22 пуунун “в” хос пуунугар этиллэр.

Бу суруктан көстөрүнэн, көһөрүү бэрээдэгинэн ыҥырыллыбыт үлэһит урукку үлэтин миэстэтиттэн уурайа илик эбит. Онон, эһиги үлэһиккитигэр сэрэтэр болдьох туолуон иннинэ бэйэтин баҕа өттүнэн сайабылыанньатын төттөрү ылыыга аккаастаан, сыыһа быһаарыыны ылыммыккыт.