ЫЙЫТ-ХОРУЙДУУБУТ: Сир учаастагын тобоҕунан дэхсилиир көҥүллэнэр дуо?

СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин Дьокуускайдааҕы экологияны кэтээн көрүүгэ кэмитиэтэ маннык иһитиннэрбитин тиэрдэбит:

— Түбэһиэх сиргэ бөҕү-сыыһы тоҕор, ол иһигэр бэйэ учаастагын дэхсилииргэ, үрдэтэргэ диэн кутар табыллыбат. Бу сир араҥатыгар буортуну оҥорорун умнумаҥ. Кэһээччилэргэ араас кээмэйдээх ирдэбиллэр олохтоноллор. Ол курдук, 2025 сылга 100 кв. м иэннээх сири бөҕүнэн толоруу, сир араҥатыгар буортуну оҥоруу иһин 166950 солк. ирдэнэр. Санатан эттэххэ, ааспыт 2024 сылга биһиги кэмитиэппит тулалыыр эйгэҕэ буортуну оҥоруу иһин уопсайа 18 мөл. солк. ирдэбили түһэрбитэ.

Холобура, сир учаастагын бөҕү-сыыһы туһанан дэхсилээһин, кутуу иһин 2024 сыллааҕы тарыыбынан сири бас билээччиттэн 755001 солк. ирдэммитэ. 2025 сылга маннык сыбаалканы буллахтарына, дефлятор коэффициенэ үрдээбитинэн, хоромньу кээмэйэ 1171989 солк. тэҥнэһиэҕэ. Ону тэҥэ хоромньуну төлүүрү таһынан буруйдаах киһи учаастагар киллэрбит, куппут бөҕүн-сыыһын хомуйан, сыбаалкаҕа илдьиэхтээх.