«Болливуд эрэ буолбатах»: IX Дьокуускайдааҕы киинэ бэстибээлигэр Индия уонна Хотугу Кавказ киинэлэрин көрдөрүөхтэрэ

Сэтинньи 4 күнүттэн 9 күнүгэр диэри Дьокуускайга ыытыллар IX Норуоттар икки ардыларынааҕы киинэ бэстибээлигэр «Фокус: Индия» уонна Хотугу Кавказ аныгы ааптарскай киинэтин анал бырагыраамалара көстүөхтэрэ. Көрөөччүлэр Индия тутулуга суох кинематографиятын уонна Хотугу Кавказ саҥа көлүөнэ режиссердарын үлэлэрин кытта билсиэхтэрэ.

«Фокус: Индия» бырагыраамаҕа дьон күннээҕи олоҕун, сыһыаннарын уонна ыарахан түгэҥҥэ сөптөөх суолу талыыларын туһунан түөрт хартыына киирдэ.

Киинэлэр маннык күннэргэ көстүөхтэрэ:

• Сэтинньи 5 күнэ, 18:30 («Синема-Киин») — «The Unbroken / Adamya». Киинэни ЯМКФ бырагырааматын дириэктэрэ Сергей Анашкин бэйэтэ билиһиннэриэҕэ.
• Сэтинньи 6 күнэ, 13:20 («Синема-Киин») — «Members of the Problematic Family».
• Сэтинньи 7 күнэ, 12:00 («Киин» киинэ тыйаатыра) — «Don’t Tell Mother».
• Сэтинньи 7 күнэ, 17:00 («Синема-Киин») — «Romantic Affairs».

«Саха сирин көрөөччүлэригэр көрдөрөр Индия саҥа киинэлэрин бырагыраамата сорох олохсуйбут санаалары суох оҥоруохтаах. Үгэс курдук, бу дойду кинематографиятын Болливуд эрэ бородууксуйатын кытта сибээстииллэр», — диэн бэлиэтээтэ Сергей Анашкин. Кини этэринэн, бырагыраамаҕа Индия соҕуруу (Карнатака уонна Тамилнад) уонна илин (Ассам, Арҕаа Бенгалия) штаттарыгар уһуллубут киинэлэр киирдилэр. Ол иһигэр Джаркханд штатыттан адиваси норуотун төрүт култууратын уонна искусственнай өй-санаа (ИИ) алтыһыыларын туһунан ураты киинэ баар.

Оттон Хотугу Кавказ аныгы ааптарскай киинэтин бырагырааматыгар «Тембот» уонна «Узлы» диэн хартыыналар киирдилэр. Иккиэн «Киин» («Центральный») киинэ тыйаатырыгар көстүөхтэрэ:

• «Тембот» — сэтинньи 6 күнүгэр 15:40 чааска.
• «Узлы» — сэтинньи 7 күнүгэр 11:00 чааска.

Манна көрөөччүлэр Александр Сокуров режиссерскай мастарыскыайын бүтэрбит Тина Мастафова уонна Олег Хамоков толору метражтаах бастакы киинэлэрин (дебюттарын) көрүөхтэрэ.

«Ааспыт уон сыл Арассыыйа кинематографиятыгар икки улахан эрэгийиэннээҕи көстүүнү бэлэхтээбитэ — саха ааптардарын триумфын уонна Хотугу Кавказка ааптарскай киинэ үөскээһинин», — диэн тоһоҕолоон эттэ Сергей Анашкин. Анал бырагыраамалар IX Дьокуускайдааҕы бэстибээл сүрүн куонкуруһун ситэриэхтэрэ. Сүрүн куонкуруска Арассыыйаттан уонна тас дойдулартан 11 толору метражтаах киинэ киирдэ.

Санатан эттэххэ, бэстибээл Арассыыйа Култууратын министиэристибэтин өйөбүлүнэн ыытыллар. Тэрээһин эрэгийиэннээҕи кинематографиятын сайыннарыыга, норуоттар икки ардыларынааҕы култуурунай алтыһыыны бөҕөргөтүүгэ уонна саха киинэтин Арассыыйаҕа, тас дойдуларга тарҕатыыга туһаайыллар.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.