Георгий Михайлов Мииринэй ыччатын кытта көрүстэ

Саха сирин Ил Дарханын уонна Бырабыыталыстыбатын дьаһалтатын салайааччыта Георгий Михайлов Мииринэй улууһугар үлэтинэн сылдьар кэмигэр М.К. Аммосов аатынан ХИФУ Политиэхиньиичэскэй институтун, ону тэҥэ Мииринэй куорат кэллиэстэрин уонна тиэхиньикумнарын устудьуоннарын кытта көрүстэ.

Көрсүһүүгэ Георгий Михайлов былаас уорганнарыгар үлэтин туһунан кэпсээтэ уонна ыччат ыйытыыларыгар хоруйдаата. Анал байыаннай дьайыы туһунан санаатын үллэстэрин кэмигэр, кини байыастарга көмө уонна өйөбүл олус суолталааҕын тоһоҕолоон бэлиэтээтэ. «Биһиги бары байыастарбытын төһөнөн күүскэ өйүүбүт да, кыайыыбыт соччонон түргэнник кэлиэҕэ», – диэн эттэ Георгий Михайлов.

Оттон устудьуоннар: «Эдэр устудьуон сааскытыгар төннүбүккүт буоллар, бэйэҕитигэр туох сүбэни биэриэх этигитий?» – диэн ыйыппыттарыгар, Георгий Николаевич кэнники кэмсиммэт туһуттан бэриллэр кыахтары мүччү туппат буоларга сүбэлиирин туһунан эттэ.

Маны таһынан, Мииринэйгэ үлэтин чэрчитинэн, Георгий Михайлов Анал байыаннай дьайыы түмэлигэр сырытта. Бу түмэли тэрийэр санааны «Учитель» позывнойдаах гвардия сержана Виктор Порядочных көтөхпүтэ. Кини фронт инники кирбиитигэр сылдьан бу бырайыагы туруорсубута, ол эрээри бэйэтин үйэтигэр олоххо киллэрэн үөрүүтүн көрбөккө хаалбыта. Алмаастаах киин куорат олохтоохторо дьоруой байыас көҕүлээһинин өйөөбүттэрэ уонна ааспыт сылга түмэл үөрүүлээхтик аһыллыбыта.

Билигин манна байыастар тус маллара, хаартыскалара ууруллубуттар. Эспэнээттэр ортолоругар Анал байыаннай дьайыыга олохторун толук уурбут биир дойдулаахтарбыт тустарынан Өйдөбүнньүк кинигэтэ баар. Бу туһунан Мииринэй улууһун дьаһалтата иһитиннэрэр.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.