Бастакы Бурцевскай ааҕыылар

Бэҕэһээ, сэтинньи 29 күнүгэр, ХИФУ филологическай факультетыгар бастакы «Бурцевскай ааҕыылар» буолан аастылар.

Тэрээһин бэрэпиэссэр, саха, английскай, американскай, дьоппуон литературатын биллиилээх чинчийээччитэ Анатолий Бурцев кэриэһигэр уонна кини 80 сааһыгар ананан ыытылынна.

Устудьуоннар 54 дакылааты билиһиннэрдилэр, оттон бэрэпиэссэр Прасковья Сивцева-Максимова, үөрэх-методическай үлэҕэ проректора Алексей Голиков, ФЛФ декана Татьяна Бердникова, аспираннар, үөрэнээччилэр, бэрэпиэссэр кэллиэгэлэрэ учуонай туһунан ахтыыларын уонна кэпсээннэрин үллэһиннилэр.

«Кини үөрэтэр ньымата судургу уонна тиийимтиэ буолара уонна биридимиэт теориятын дириҥник билэрэ. Мин санаабар, Анатолий Алексеевич идэтин уонна олоҕун суола бу курдук тэҥнэһиини уонна гармонияны көрдүүр холобурунан буолар. Кини ирдэбиллээх, кытаанах, ол гынан баран үтүө санаалаах, демократичнай этэ», — диэн Марина Бурцева аҕатын туһунан кэпсээтэ.