5 мөл.солк. нолуоктан кистээбит экс-салайааччы сууттаныа

СӨ Борокуратуурата тутуу эйгэтигэр үлэлиир «Куб-8» ХЭУо урукку генеральнай дириэктэрин холуобунай дьыалатын бигэргэтэн суукка ыытта. Кини нолуокка төлөнүөхтээх 5 мөлүйүөнтэн тахса солкуобайы кистээбит уонна «сымыйа» салайааччы докумуоннарын биэрбитигэр буруйданар.

Силиэстийэ сабаҕалыырынан, 2024 сыллаахха буруйданааччы тэрилтэтэ нолуокка улахан иэстээҕин билэр эбит. Нолуок уорганнара ол иэһи устан ылаары, хампаанньа бааҥҥа баар счеттарын туппуттарын үрдүнэн, кини туора атын тэрилтэлэр нөҥүө 5 мөл. солк. тахса суумалаах төлөбүрдэри ыыппыт. Мантан сылтаан нолуок уорганнара тутан ылар харчылара суох буолбут.

Ону таһынан,  урут салайааччы суут уурааҕынан генеральнай дириэктэр дуоһунаһыттан туоратыллыбыт эбит. Ол эрээри салгыы хампаанньаны салайар сыалтан, бэйэтин билэр киһитин дириэктэр буоларыгар көрдөспүт. Ол табаарыһа тэрилтэни салайар туох да уопута да, баҕата да суох эбит. Ол кэннэ нолуок уорганыгар сымыйа дааннайдары биэрэн, ол табаарыһын Юридическай сирэйдэр биир кэлим судаарыстыбаннай реестригэр (ЕГРЮЛ) генеральнай дириэктэринэн регистрациялаппыт.

Арассыыйа Федерациятын интэриэһин көмүскээн, борокуратуура нолуоктан кистэммит харчыны төттөрү төлөтөргө экс-салайааччыга ирдэбил түһэрбит. Ону хааччыйар туһуттан, буруйданааччы баайыгар-дуолугар, ол иһигэр массыынатыгар уонна дьиэтигэр-уотугар арест ууруллубут. Холуобунай дьыала салгыы көрүллэригэр Дьокуускай куорат суутугар ыытылынна.