«Ыллыыр таастар» 85 бырыһыан бэлэмнэр

Саха сирин биир саамай кэрэ көстүүлээх, ураты айылҕалаах сиринэн Сиинэ туруук таастара буолаллар. Ил Дархан Айсен Николаевы кытта «Быһа лииньийэ» кэмигэр  соторутааҕыта манна «Өлүөнэ туруук таастарын» холобурунан туризм инфраструктуратын тэрийии туһунан ыйытыы турбута. Ол үлэ хайдах хаамыылааҕый уонна Сиинэҕэ туох уларыйыы күүтэрий?

Билиҥҥи туругунан, «Ыллыыр таастар» диэн ааттаах эбийиэккэ тутуу үлэтэ үгэнигэр. Тутуу бэлэмэ 85 бырыһыаҥҥа тиийдэ, оттон бырайыак уопсай сыаната 70 мөл. солкуобайга тэҥнэһэр. Былаан быһыытынан, бары үлэ сэтинньи 10 күнүгэр диэри толору түмүктэниэхтээх.

«Сиинэ туруук таастара — Саха сирин туризмыгар биир саамай кэскиллээх хайысханан буолар. Биһиги сорукпут — айылҕа ураты көстүүтүн харыстаан туран, дьон сынньанарга табыгастаах уонна куттала суох буоларын хааччыйар инфраструктураны тэрийии. Бүгүн тутуу үлэтэ үрдүк таһымҥа хаамыылаах, сүрүн үлэлэр болдьоммут кэмигэр түмүктэнэллэрэ былааннанар», — диэн Саха Өрөспүүбүлүкэтин Урбааҥҥа, эргиэҥҥэ уонна туризмҥа миниистирэ Георгий Андреев бэлиэтээтэ.

Бүгүҥҥү күҥҥэ дьон киирэр аанын бэрийиитэ толору түмүктэммит. Манна хонтуруоллуур-аһарар пуун, сувенир атыылыыр лааппы, кофе иһэр сир уонна икки санитарнай блок тутуллубуттар.

Ыалдьыттар сынньаналларыгар түөрт сиринэн мас тэлгэһэлэр уонна олоппостоох, остуоллаах алта сынньанар сир оҥоһуллубут. Ону тэҥэ, саха төрүт балаҕанын каркааһын туруоруу уонна иһинээҕитин саба охсуу үлэтэ түмүктэммит.

Көрүү былаһааккаларын, хайаҕа тахсар кирилиэстээх ыллыктар уонна кытылтан киирэр ааҥҥа диэри ыллыктар каркаастарын туруоруу бүппүт. Ону сэргэ киирэр аантан бастакы сынньанар сиргэ диэри мас тэлгэһэ ыллыктар тардыллыбыттар. Түөрт киирэр аарка тимир каркаастара туруоруллубуттар. Иниспиэктэр дьиэтин ис өттүн оҥоруута түмүктэммит, түннүктэрэ уонна аана туруоруллубут.

Кэлэр түһүмэххэ турист ыллыгын устун навигация истиэндэлэрин уонна ыйан биэрэр бэлиэлэри туруоруохтара. Туруору сыырдаах, кутталлаах сирдэргэ куттал суох буолуутун ирдэбилинэн күрүөлэр уонна сэрэтэр бэлиэлэр оҥоһуллуохтара.

Бу улахан инфраструктура Сиинэ туруук таастарыгар кэлэр дьон сынньалаҥын өссө табыгастаах уонна, саамай сүрүнэ, куттала суох оҥоруоҕа.