Үрдүк үөрэххэ докумуон тутуута бэс ыйын 20 күнүттэн саҕаланыа

Дойду үрдүнэн бары үрдүк үөрэх кыһаларыгар сайабылыанньаны уонна докумуоннары тутуу биир кэлим күн – бэс ыйын 20 күнүттэн саҕаланар.

Бу туһунан ыам ыйын 10 күнүгэр РФ Үөрэх уонна билим министиэристибэтин пресс-сулууспатыгар сигэнэн, ТАСС иһитиннэрэр.

Манна үрдүк үөрэх бары таһымнарыгар (бакалавриат, магистратура, специалитет, базовай үрдүк үөрэх, анал үрдүк үөрэх) сайабылыанньаны уонна докумуоннары тутуу туһунан этиллэр. Ол эрээри докумуону тутууну түмүктүүр болдьох үрдүк үөрэх таһымыттан уонна үбүлээһин тутулуттан көрөн уратылаһар.

Ол курдук, бакалавриат, специалитет уонна базовай үрдүк үөрэх бырагыраамаларынан бүддьүөт миэстэтигэр докумуоннары тутуу от ыйын 10-20 күннэригэр түмүктэниэҕэ, оттон төлөбүрдээх үөрэххэ – балаҕан ыйын 20 күнүгэр диэри салҕаныа.

Магистратура уонна анал үрдүк үөрэх бырагыраамаларынан бүддьүөт миэстэтигэр үөрэнэргэ докумуону атырдьах ыйын 20 күнүгэр диэри, оттон төлөбүрдээх миэстэҕэ – балаҕан ыйын 20 күнүгэр диэри биэриэххэ сөп буолуо.

Бу иннинэ Үөрэх уонна билим министиэристибэтэ 2026 сылга үрдүк үөрэххэ ылыы бэрээдэгэр уларытыылары киллэрбитин туһунан биллэрбиттэрэ. Докумуону биэрии, кэллиэс бүтэрбит дьон үөрэххэ киириилэрин быраабылалара уонна да атын дьаһаллар уларыйдылар. Холобур, 2026 сылга абитуриеннар докумуоннарын «Госуслуги» портал нөҥүө, университет докумуон тутар хамыыһыйатыгар бэйэлэрэ тиийэн эбэтэр буоста нөҥүө ыытар кыахтаныахтара. Оттон үрдүк үөрэх кыһалара бэйэлэрин иһинээҕи информационнай систиэмэлэрин нөҥүө сайабылыанньаны туталлара тохтотуллуоҕа.