Үс сыл байыастар уонна кинилэр дьиэ кэргэттэрин туһугар

Аҕа дойдуну көмүскээччилэр пуондалара тэриллэн үлэлээбитэ үс сыл буолла.

2023 сыллаахха муус устарга РФ Бэрэсидьиэнэ Владимир Путин «Аҕа дойдуну көмүскээччилэр» судаарыстыбаннай пуонданы тэрийэр туһунан Ыйаахха илии баттаабыта. Дойдуга биир бастакынан пуонда филиала Саха сиригэр тэриллибитэ.

Пуонда үс сылынан Ил Дархан Айсен Николаев эҕэрдэлээтэ.

—Үс сыллааҕыта Арассыыйа Бэрэсидьиэнэ Владимир Путин «Аҕа дойдуну көмүскээччилэр» пуонданы тэрийэр туһунан Ыйаахха илии баттаабыта. Бу быһаарыы байыаннай дьайыы бэтэрээннэригэр, кинилэр чугас дьонноругар уонна олохторун толук уурбут дьоруойдар дьиэ кэргэттэригэр тирэх буолбута. Саха сиригэр бастакы күннэртэн бу көмөнү, өйөбүлү оҥорор ситиминэн буолбута. Бу сылларга 10 тыһыынчаттан тахса көмө, өйөбүл көрдүүр, ыйытар, чопчулаһар суруктар киирбиттэрэ бэлиэтэнэр. Бүгүн өрөспүүбүлүкэҕэ 61 социальнай координатор үлэлиир. Кинилэр биһиги көмүскээччилэрбит, кинилэр дьиэ кэргэттэрин аттыларыгар сылдьар, өйөбүлү оҥорор дьон. Араас хайысхаларынан көмөлөһөллөр: докумуону оҥотторууттан, психологическай өйөбүлгэ, үлэҕэ-хамнаска уонна эйэлээх олоххо төннүүгэ тиийэ көмөлөһөллөр, — диэн этэр Ил Дархан Айсен Николаев.

Үс сыллаах үлэ түмүгүн «Аҕа дойдуну көмүскээччилэр» пуонда филиалын салайар Алексей Александров маннык этэр:

—Үс сыл — бу бастакы боччумнаах түмүгү таһаарарга сөптөөх болдьох. Бу кэм устатыгар Саха сиригэр байыаннай дьайыы бэтэрээннэрин уонна кинилэр дьиэ кэргэттэрин чилиэннэрин арыаллыырга көдьүүстээх уонна тиһиктээх үлэ ыытылынна. Түмүктэр көстөллөр: тыһыынчанан ыйытыы быһаарылынна, бэтэрээннэр үлэнэн хааччылыннылар, саҥа идэлэри ылаллар, бэйэ дьыалатын тэринэллэр. Саамай сүрүнэ — кинилэр кыһамньы баарын, болҕомто уурулларын өйдүүллэр. Ханнык да түгэҥҥэ соҕотох хаалбаттарын билэллэр. Билигин биһиги иннибитигэр өссө элбэх үлэ күүтэр. Биһиги дьоруойдарбыт тустарыгар туох баар кыһамньыбытын салгыы уурабыт, үлэлэһэбит, — диэн этэр кини.

Бүгүн Саха сиригэр 61 социальнай координатор үлэлиир, кинилэртэн 25 — Дьокуускайга. Координатордар ортолоругар икки байыаннай дьайыы бэтэрээнэ уонна байыаннай дьайыы кыттыылаахтарын дьиэ кэргэттэриттэн түөрт киһи үлэлиир.

Сиһилии: https://www.sakha.gov.ru/news/43074

СӨ Ил Дарханын уонна Бырабыыталыстыбатын пресс-сулууспата