“Ытык сир” пааркаҕа сиэр-туом оҥорор холумтан турда

РФ Бэрэсидьиэнин Владимир Путин “Табыгастаах куорат эйгэтэ” национальнай бырагырааматынан 2025 сылтан аэропорт диэки барар суолга Кыайыы пааркатын кэннигэр “Ытык сир” этнокомплекс тутулла турар.

Ыам ыйын 3 күнүгэр ити комплекска күнү көрсөр, сиэр-туом оҥорор холумтан турда. Ол курдук, барар-кэлэр айанньыттар, байыаннай дьайыыга  барааччылар алгыс ылар ытык сирдэрэ баар буолла.

Алгысчыт Афанасий Федоров этэринэн, манна айанныыр дьону таһынан Күнү көрсүөххэ, дьону арчылыахха, ону таһынан үлэҕэ-хамнаска ыктара сылдьар, атын да кыһалҕалаах дьон кэлэн эмиэ ис сүрэхтэриттэн Үөһээ Айыылартан, өбүгэлэриттэн күүс-көмө көрдөһөр сирдэрэ буоллун диэн баҕа санаалаах оҥорбуттар.

«Күнү көрсүүнү тэрийбит, элбэх итэҕэли, сиэри-туому көрбүт дьон – өбүгэлэрбит — билиҥҥи да, кэлэр да ыччакка кэскиллээх олох киэҥ аартыгар үктэнэллэригэр үөһээ халлаантан күүс-көмө буола туралларын умнумуохпутун наада», — диир кини.

«Бүгүн ураты күн. Афанасий Семенович Федоров кэлэн, холумтаны аһыы сиэрин-туомун алгысчыттарга, бу түөлбэ олохтоохторугар көрдөрдө. Киниттэн киһи элбэх билиини-көрүүнү ылар. Ол иһин саха оҕото хайаан да сахалыы тыыҥҥа сыстыахтаах, бэйэтин иһиллэнэ үөрэниэхтээх диэн, сиэннэрбэр саха сиэрин-туомун көрдөрөөрү илдьэ кэллим», — диир киин  куорат олохтооҕо Татьяна Портнягина.