Юрий Трутнев байыастарга Саха сиригэр оҥоһуллубут тиэхиньикэни туттарда

Донецкай Норуодунай Өрөспүүбүлүкэҕэ Арассыыйа Бырабыыталыстыбатын бэрэссэдээтэлин солбуйааччыта – РФ Бэрэсидьиэнин Уһук Илиннээҕи федеральнай уокурукка боломуочунай бэрэстэбиитэлэ Юрий Трутнев Илиннээҕи байыаннай уокурук салалтатын, БАРС «Рубикон» баҕа өттүнэн этэрээттэрин уонна Уһук Илиннээҕи буойуннары кытта көрүстэ. Кини байыаннайдарга анал тэриллэри уонна сэби-сэбиргэли тиксэрдэ.

Байыаннай дьайыы зонатыгар «Патриотическай» ТОР тэрилтэлэрин оҥорон таһаарбыт тэриллэрэ тиксэрилиннэ. Ол иһигэр Саха сиригэр, Забайкальскай, Приморскай кыраайдарга уонна Магадан уобалаһыгар оҥоһуллубут 1500-тэн тахса FPV-дрон баар. Маны таһынан салгын ретранслятордара уонна ыарахан уйуктаах «Паук-30» мультироторнай дроннар  туттарылыннылар.

Ону сэргэ Саха сирин оҥорон таһаарааччыларыттан инники кирбиигэ робототехническай комплекстар, электроэндуро-матасыыкыллар уонна вездеходтар бардылар. Буойуннарга FPV-дроннарга анаммыт оптоволокнону эрийэр станоктары, радиоэлектроннай охсуһуу (РЭБ) сириэстибэлэрин, о.д.а. биэрдилэр.

Өрөспүүбүлүкэбитигэр анал байыаннай дьайыы наадыйыыларыгар анаан маннык тиэхиньикэ оҥоһуллан тахсар:

• араас көрүҥнээх FPV-дроннар уонна салайар комплекстар;
• «Якт-Сокол» квадроцикллар;
• РЭБ  тиһиктэрэ;
• сиринэн сылдьар робототехническай комплекстар;
• «Тимир АТ» электроэндуролар.

«Патриотическай» ТОР — бу 2023 сылтан үлэлиир, АБДь наадыйыыларыгар анаан бородууксуйаны оҥорорго уонна тиэрдэрбитигэр судаарыстыба өттүттэн өйөбүл дьаһалларын комплекса буолар. Уһук Илин территориятыгар байыаннай дьайыыга наадалаах табаары оҥорон таһаарааччыларга анал судаарыстыбаннай өйөбүл дьаһаллара олохтоннулар. Бүгүҥҥү күҥҥэ байыаннай тиэхиньикэни уонна сэби-сэбиргэли оҥорор 28 тэрилтэ өйөбүлү ылбыт. Бу бырайыак чэрчитинэн АБДь зонатыгар 65 тыһыынча тэрил ыытылынна. Оттон 2023-2025 сылларга Уһук Илин эрэгийиэннэриттэн барыта 607 тыһыынчаттан тахса тэрил тиксэриллибит.

Сиһилии манна ааҕыҥ: https://www.sakha.gov.ru/news/60067