Юрий Трутнев: пуорум устуоруйатыгар рекорднай түгэни оҥоруохтара

Владивостокка ыытыллар Илиҥҥи экэнэмиичэскэй пуорумҥа уопсайа 6,5 триллион солкуобай суумалаах 385 сөбүлэһии түһэрсиллэрэ былааннанар.

Былааннар олоххо киирдэхтэринэ, быйылгы пуорум илии баттаммыт дуогабардарын ахсаанынан ИЭП устуоруйатыгар рекорднай түгэни оҥоруоҕа, диэн РФ Бырабыыталыстыбатын Бэрэссэдээтэлин солбуйааччы уонна Уһук Илиҥҥи федеральнай уокурукка бэрэсидьиэн боломуочуйалаах бэрэстэбиитэлэ Юрий Трутнев УИФУо Сэбиэтин мунньаҕын түмүгүнэн ыытыллыбыт брифиҥҥэ эттэ.

«Биһиги уопсайа 6,5 триллион солкуобай суумалаах 350-тан тахса дуогабары – бүгүҥҥү күҥҥэ 385 – түһэрсэр былааннаахпыт. Бу рекорднай суума буолар. Маннык кээмэйдээх сөбүлэһиилэр урут хаһан да ситиһиллибэтэхтэрэ. Биһиги Владимир Владимирович туруорбут соругун толорорго дьулуһабыт», — диэтэ Трутнев.

Юрий Трутнев пуорумҥа бэлэмнэнии Арассыыйа Бэрэсидьиэнин Уһук Илин экэниэмикэтигэр 12 триллион солкуобай инвестицияны 2030 сылга диэри тардар сорудаҕар сөп түбэһиннэрэн барарын бэлиэтээтэ. Билигин ирдэнэр үп аҥара хааччыллыбыт, ону тэҥэ бу сыалы ситиһии тэтимэ былааннаммыт сыалы 11% куоһарар.

ИЭП-2025 Саха сиригэр инвестиционнай бииргэ үлэлээһиҥҥэ уонна саҥа бырайыактары олоххо киллэриигэ көдьүүстээх былаһаакканан буолар.  Пуорум түмүгүнэн өрөспүүбүлүкэ уопсайа 106 млрд солкуобайтан тахса суумалаах 27 сөбүлэһиини түһэрсибитэ, оттон уопсай инвестиционнай бартыбыал 641 млрд кэриҥэ буолла.

“Бу бөдөҥ бырайыактары олоххо киллэриигэ уонна дьон олоҕун хаачыстыбатын тупсарыыга бигэ тирэҕинэн буолар”, — диэн Ил Дархан Айсен Николаев тоһоҕолоон этэн турар.

СӨ Ил Дарханын уонна Бырабыыталыстыбатын пресс-сулууспата.