Юрий Трутнев тиэхиньикэлэри байыаннай сулууспалаахтарга туттарда

РФ Бырабыыталыстыбатын бэрэссэдээтэлин солбуйааччы – Уһук Илиҥҥэ РФ Бэрэсидьиэнин боломуочуйалаах бэрэстэбиитэлэ Юрий Трутнев байыаннай дьайыы ыытылла турар зонатыгар байыаннай сулууспалаахтарга FPV-дроннары, робототехническай комплекстары, Саха сиригэр хомуллубут «Тимир Ат»  электроэндуроны уонна  “Якт-Сокол” квадроцикллары тириэртэ.

Кини Донецкай Норуодунай Өрөспүүбүлүкэҕэ сылдьар кэмигэр Илиҥҥи байыаннай уокурук командованиетын уонна баҕа өттүлэринэн барбыт байыастары, ол иһигэр “Рубикон” БАРС этэрээтин көрүстэ. Боломуочуйалаах бэрэстэбиитэл инники кирбиигэ элбэх байыаннай тиэхиньикэни, үрдүк технологиялаах тэриллэри тириэртэ. Байыаннайдар “Патриотическай” урутаан сайдар сир-уот (ТОР) чэрчитинэн, Уһук Илин тэрилтэлэрэ оҥорор бородууксуйаларын туттулар. Байыастарга 1500-тэн тахса FPV-дрону уо.д.а. аҕаллылар.

«Патриотическай» ТОР мэхэниисимэ Уһук Илиҥҥэ 2023 сылтан үлэлиир уонна судаарыстыба ураты өйөбүлүн ылар. Бу систиэмэ  олохтоох тэрилтэлэр байыаннай дьайыыга наадалаах табаардары түргэнник оҥороллоругар  уонна тириэрдэллэригэр  көмөлөһөр. Билигин судаарыстыба Уһук Илиҥҥи федеральнай уокурукка байыаннай тиэхиньикэни уонна тэриллэри оҥорор 28 тэрилтэҕэ көмөлөһөр. Уһук Илиҥҥи собуоттарга сөмөлүөт тииптээх беспилотниктары уонна араас модификациялаах FPV-дроннары, БПЛА-ны  суулларар  прибордары, багги-вездеходтары, “Курьер” роботтары, “Тимир Ат” электроматасыыкыллары, бронежилеттары, хааны тохтотор турникеттары, үрдүк технологиялаах протезтары уонна ууну ыраастыыр мобильнай ыстаансыйалары оҥороллор.

Бэлиэтээн эттэххэ, “Патриотическай” ТОР үлэлиир кэмигэр пуруоҥҥа хайыы үйэ 65 тыһыынча араас тэриллэри, оттон 2023-2025 сылларга Уһук Илин эрэгийиэннэрэ байыаннай дьайыы зонатыгар 607 тыһыынчаттан тахса туһалаах таһаҕаһы ыыттылар.

СӨ Ил Дарханын уонна бырабыыталыстыбатын пресс-сулууспата