Юрий Трутнев Уһук Илин сайдыытын түмүктэрин сырдатта

РФ бырабыыталыстыбатын бэрэссэдээтэлин солбуйааччы – Уһук Илиҥҥэ РФ бэрэсидьиэнин боломуочуйалаах бэрэстэбиитэлэ Юрий Трутнев  Федерация Сэбиэтин мунньаҕар Уһук Илиҥҥи федеральнай уокурук сайдыытын, ол иһигэр Саха сирин бырайыактарын туһунан,  дакылааты оҥордо. Кини уон сыллаах үлэ түмүктэрин таһаарда, эрэгийиэн инники кэскилин бэлиэтээтэ.

Юрий Трутнев: «Федерация Сэбиэтэ Уһук Илин эрэгийиэннэригэр болҕомтотун иһин туспа махтаныахпын баҕарабын. Кэнники биэс сылга Федерация Сэбиэтигэр  Амур уобалаһын, Чукотка автономнай уокурук, Хабаровскай уонна Приморье кыраайдарын, Саха Өрөспүүбүлүкэтин уонна Бурятия  алта күнэ ыытыллыбыта”, — диэтэ.

“Сүрүн хапытаалга инвестиция улаатыыта Арассыыйа орто көрдөрүүтүн балтараа төгүл аһарда. Судаарыстыба өйүүр бырайыактарыгар 6 триллион суумалаах үп угулунна, тыһыынчаттан тахса тэрилтэ үлэҕэ киллэрилиннэ, 180 тыһыынчаттан тахса үлэ миэстэтэ таһаарылынна. Сааҥсыйалар баалларын үрдүнэн, аҥаардас 2025 сылга угуллубут инвестиция  сыллааҕы кээмэйэ 1 триллион солкуобайтан таҕыста”, — диэн хайа-байытар кэмбинээттэр, гааһы переработкалыыр собуот, судоверфь, космодром тутулланнар,  Уһук Илиҥҥэ саҥа көстүүнү биэрбиттэрин санатта.

Ону таһынан, Саха сиригэр “Денисовскай” уонна “Инаглинскай” хайа-байытар кэмбинээттэр экэниэмиэкэни тупсараллар.  «Үчүгэй уларыйыылары Уһук Илин бары эрэгийиэннэрэ биллилэр диэн этэртэн куттаммаппын.  Олох тупсарыгар сүрүн үнүстүрүмүөнүнэн Уһук Илин куораттарын маастар-былааннарын оҥоруу туһунан быһаарыы буолла. Бу бырагыраама 4 мөлүйүөн киһини – улахан эрэгийиэн нэһилиэнньэтин улахан аҥаарын кэриэтэ хабар”, — диэтэ Юрий Трутнев.

Кини бэлиэтээн эппитинэн,  Уһук Илиҥҥэ байыаннай дьайыыга сулууспалаабыт 2,5 тыһыынча киһи — судаарыстыбаннай  сулууспалаах, боломуочуйалаах бэрэссэдээтэл түөрт солбуйааччыта байыаннай дьайыыга кытынна. “Буойун” байыаннай-патриотическай  иитии 7 киинэ Уһук Илиҥҥэ үлэлиир. Сыл устатыгар өссө 4 итинник киин арыллара торумнанар.

СӨ Ил Дарханын уонна бырабыыталыстыбатын пресс-сулууспата