Юрий Трутнев: Уһук Илиҥҥэ эбийиэктэри көмүскүүргэ Крым уопутун туһаныахпыт

Атырдьах ыйын 14 күнүгэр Арассыыйа Бырабыыталыстыбатын Бэрэссэдээтэлин солбуйааччы – Бэрэсидьиэн Уһук Илиннээҕи федеральнай уокурукка боломуочуйалаах бэрэстэбиитэлэ Юрий Трутнев инфраструктура эбийиэктэрин уонна стратегическай суолталаах тэрилтэлэри көмүскүүр уопуту үөрэтэр сыаллаах Крым Өрөспүүбүлүкэтигэр үлэ сырыытынан тиийдэ.

Бу сырыыга УИФУ-га боломуочуйалаах бэрэстэбиитэл солбуйааччыта Роман Алисенов, Хабаровскай кыраай губернатора Дмитрий Демешин, Магадан уобалаһын губернатора Сергей Носов, Амурскай уобалас губернатора Василий Орлов кытыннылар.

Үлэтин хаамыытыгар дэлэгээссийэ чилиэннэрэ территорияны көмүскээһин тосхоллорун, мобильнай уоттуур бөлөхтөр үлэлэрин тактикатын уонна технологиятын кытта билстилэр, ПВО (салгынтан көмүскэнэр тиһик) салайар кииннэригэр сырыттылар.

Кинилэргэ салгынтан саба түһүүнү төттөрү охсуу, сири-уоту кэтээн көрүү, дронтан харыстанар пассивнай көмүскэли тэрийии үлэлэрин көрдөрдүлэр. Ол иһигэр электрониканы уонна радиосигналы туһаммакка эрэ дроннары тохтотор эбэтэр эстэр күүстэрин намтатар инженернэй уонна физическэй барьердар комплекстарын туруоруу уопута билиһиннэрилиннэ. Маны таһынан, мобильнай уоттуур бөлөхтөрү салайар кииннэр үлэлэрэ уонна доброволецтары бэлэмнээһин боппуруостара дьүүллэһилиннилэр.

Уһук Илиннээҕи губернатордар бэйэлэрин өттүлэриттэн «Патриотическай» диэн ТОР чэрчитинэн оҥоһуллубут үлэлэринэн үллэһиннилэр, эрэгийиэннэр тэрилтэлэрэ таһаарар байыаннай да, гражданскай да сыалга туһаныллар  бородууксуйаларын туһунан кэпсээтилэр. «Биһиги суолталаах инфраструктура эбийиэктэрин, тэрилтэлэри көмүскүүргэ уонна, саамай сүрүнэ, дьон олоҕун, доруобуйатын харыстыырга бары кыахпытын ууруохтаахпыт. Крым былаастарыгар сири-уоту көмүскээһиҥҥэ уонна өстөөх саба түһүүтүн төттөрү охсууга улахан уопут мунньулунна. Бу сатабыллары уонна уопуту биһиги Уһук Илин эрэгийиэннэригэр туһаныахпыт», — диэн эттэ Юрий Трутнев.

Сиһилии: https://www.sakha.gov.ru/news/59626