Үүт, килиэп оҥорооччуларыгар улахан кыһалҕа буолла — бэнсииҥҥэ наадыйаллар

Нам улууһун отчуттарын, ону тэҥэ ас-үөл салаатыгар уматыгынан хааччыйыыга болҕомтолорун уураллар. Ол курдук, улуустааҕы тыа хаһаайыстыбатын управлениетын чахчытынан, 25 туонна уматыгы тарҕаппыттар.

— Мантан 5 т “Туймаада-Нефть” АУо-тан, 20 туонна “Сервис-Ойл” ньиэп хампаанньатыттан ылбыппыт. Ол кэнниттэн 30 туонна “Сервис-Ойл”тэрилтэни кытта дуогабардаһан хаһаайыстыбаларбыт кутта сылдьаллар.

Уматык үһүс кэлиитигэр СӨ Тыатын хаһаайыстыбатын уонна ас-үөл бэлиитикэтин министиэристибэтигэр биһиэхэ 30 туонна биэрэллэригэр сайаапкалаатыбыт. Бу — сэлээркэҕэ. Билигин биһиги бэнсииҥҥэ наадыйабыт. Тоҕо диэтэххэ, үүт, килиэп оҥорооччуларбытыгар улахан кыһалҕа буолла. Килиэби таһар бэнсииммит суох. Бүгүҥҥү күҥҥэ уматык хампаанньалара хааччахтаан биэрэллэр, — диэтэ Нам улууһун тыа хаһаайыстыбатын управлениетын начаалынньыга Владимир Макаров.

92-лээх, 95-х бэнсиини уматык каартатынан биэрэллэр эбит. Уу кэлэн мэһэйдээн, Нам улууһугар мотуордаах оҥочолоругар эҥин бэнсиин олох тиийбэт. Онон бу боппуруоһу  уталыппакка быһаарыахтарын наада.

Хаартыска: В.Макаров тиксэрдэ.