«Звезднай» түөлбэҕэ оҕо уһуйаанын тутуутун иккис түһүмэҕэ түмүктэнэн эрэр

Дьокуускай куорат саҥа «Звезднай» түөлбэтигэр 315 миэстэлээх оҕо уһуйаанын тутуута салҕанар. Бүгүҥҥү күҥҥэ тутуу иккис түһүмэҕэ бүтэн эрэр, эбийиэк бэлэмэ 50% тэҥнэһэр. Уһуйаан дьиэтин үрдүн бүрүйүү, вентиляцияны оҥоруу, пандустары туруоруу уонна ис өттүнээҕи хара үлэлэрэ  ыытыллаллар.

Санатар буоллахха, бу эбийиэк инфраструктураны үбүлүүр кирэдьиитинэн федеральнай үбү тардан туран тутуллар. Оҕо уһуйаанын уопсай иэнэ 5463,06 кв.м.  – манна оонньуур уонна утуйар хостор, успуорт уонна аактабай саалалар, анал кылаастар уонна мастарыскыайдар, улахан куукуна, хаһаайыстыбаннай, көмө уонна да атын хостор баар буолуохтара.

Сайын оҕолор күн уотугар уонна ыраас салгыҥҥа элбэхтик сылдьалларын курдук, таһырдьааҥҥы оонньуур уонна успуорт зоналарыгар ураты болҕомто ууруллуоҕа.