Дмитрий Садовников Дьокуускай суолларын бэрэбиэркэлээтэ

Саха Өрөспүүбүлүкэтин Бырабыыталыстыбатын Бэрэссэдээтэлин бастакы солбуйааччыта Дмитрий Садовников Дьокуускай куоракка Дежнев уонна Ойуунускай уулуссаларын хапытаалынай өрөмүөннэрин бэрэбиэркэлээтэ.

Үлэлэр РФ Бэрэсидьиэнэ Владимир Путин көҕүлээбит «Олох инфраструктурата» национальнай бырайыагын чэрчитинэн ыытыллаллар.

Дьокуускайга биир сүрүн эбийиэгинэн Ойуунускай уулуссата буолар, Дежнев уулуссаттан Октябрьскай уулуссаҕа диэри учаастакка хапытаалынай өрөмүөн бара турар. Саҥардыллыбыт учаастак уопсай уһуна 2 км тиийэр. Бүгүҥҥү туругунан, Петровскай уулуссаттан Октябрьскай уулуссаҕа диэри учаастакка уу ааһар турбалары уонна инженернэй ситимнэргэ футлярдары ууруу үлэтэ түмүктэммит. Уулуссаҕа сырдатыы ситимин уонна сатыы дьон хаамар ыллыктарын оҥорууга бэлэмнэнии үлэлэр салгыы ыытылла тураллар. Хапытаалынай өрөмүөнү түмүктээһин 2027 сылга былааннанар.