Корней Чуковскай остуоруйалара сахалыы саҥардылар

Корней Чуковскай остуоруйалара сахалыы саҥардылар.

«Офсет» кинигэ кыһатыгар оҕолорго аналлаах «Мэрбэлиэй» диэн дьиибэ-дьээбэ ааттаах кинигэ бэчээттэнэн таҕыста. Суруналыыс Зинаида Топурко (Зинаида Ил) оҕо литературатын классига Корней Чуковскай «Бармалей» уонна «Айболит» диэн айымньыларын сахалыы тылбааһа ити курдук күн сирин көрдө. Манна даҕатан эттэххэ, бу үлэтэ 2020 сыллаахха оҕоҕо аналлаах уус-уран литературнай айымньы өрөспүүбүлүкэтээҕи куонкуруһугар тылбааска бастакы миэстэни ылбыт эбит.

Аатырбыт оҕо суруйааччыта бу остуоруйалары айан биһиэхэ бэлэхтиэҕиттэн ыла лоп курдук биир үйэ ааста. Онтон ыла Чуковскай оҕо аймахха анаабыт эгэлгэ уобарастарын сылаас тыынын нууччалыы тыллаах хас көлүөнэ киһи өйгө-сүрэххэ иҥэрэн улааппыта буолуой? Кэрэхсэнэллэрин тухары мантан да салгыы төһөлөөх кырачаан дьону умсугутуохтарай?

Биһиги бары араас сылларга умсугуйан аахпыт бу икки остуоруйабытын уус-уран тылбаас ааптара сахалыы хомоҕой тылынан оҕо ылынар гына суруйан таһаарбыт. Хоһоон бэртээхэй тэтимин тутуһан, нууччалыы устуруокалары саҥа тылланан эрэр кырачаан киһи саҥарар дьоҕуругар сөп түбэһиннэрэн уу сахалыы дэгэттээн айан таһаарбыта ордук кэрэхсэбиллээх. Кинигэ өссө биир уратыта – хаҥас лииһигэр нууччалыы тиэкиһэ (оригинал) бэриллэр, уҥа өттүгэр – сахалыыта. Алын кылаастарга үөрэнэр оҕолор тэҥнээн аахтыннар диэн. Нууччалыы суруллубут айымньы бэйэбит тылбытынан-өспүтүнэн хайдах бэриллиэн уонна өйдөнүөн сөбүн көрдүннэр, сыаналаатыннар, өйдөөтүннэр диэн. Тылбаас ааптара «Бармалейы» уонна «Айболиты» аныгы үйэҕэ сахалыы саҥардыбыт сүрүн сыала-соруга  – ити.

Cаҥа тылланан эрэр кыракый киһиэхэ интэриниэт, социальнай ситимнэр нөҥүө нуучча тылын сабыдыала сөҕүмэр. Билигин саха оҕото үксэ ийэтин үүтүн кытта бииргэ иҥэринэр төрөөбүт тылын оннугар гаджет саҥатын ылынара быдан дэбигис буолла. Тылбаасчыт Зинаида Топурко айан-тутан таһаарбыт үлэтэ маннык ураты көлүөнэҕэ ананар. Онон «Мэрбэлиэй» киһи эрэ кэрэхсиэх сонун кинигэ эбит.

Аны кинигэ ойуута-мандара биир уратылаах: Зинаида Иннокентьевна сиэнин София-Вера Белоцерковская өҥнөөх уруһуйдарынан киэргэтиллибит. Остуоруйа уобарастарын кырачаан худуоһунньук киистэтэ өйтөн оҥорон көрөн ойуулаан таһаарбыта көрүөхтэн кэрэ!

Бу кинигэ төрөөбүт тылларынан саҥарар, ааҕар уонна ааҕа үөрэниэн баҕарар саха оҕолоругар күндү бэлэх буолуохтун.

Бүөтүр БОППУОК,

суруналыыс.

Хаартыскалар: ааптар тиксэриилэрэ