Сэбиэскэй кэмҥэ дьахталларга тугу бэлэхтииллэр этэй?

Эһиги эбэҕит, ийэҕит уонна сэбиэскэй кэм мөлүйүөнүнэн дьахталлара кулун тутары хайдах долгуйан күүтэллэрин билэҕит дуо? Бырааһынньык бэйэтэ буолбакка, эр дьон бэлиэ күн буолуо хас да нэдиэлэ инниттэн «бэлэх көрдүүр» түбүккэ түһэллэрэ долгутуулаах буолара. Life.ru саайт урукку кэмҥэ дьахталларга тугу бэлэхтииллэрин уонна тоҕо ол маллар билигин даҕаны эбэбит серваныгар хараллан туралларын туһунан суруйар.

Билигин сорох бэлэхтэри көрдөххө дьиктиргиэххэ, эбэтэр күлүөххэ да сөп курдук, ол эрэн урукку кэмҥэ ити маллар дьиҥнээх баайга тэҥнэнэллэрэ.

Духуу — таптал уонна дэписсиит бэлиэт

ССРС кэмигэр духуу флакона боростуой парфюм буолбатах этэ. Бу эр киһи өттүттэн дьиҥнээх «дьоруойдуу» быһыы уонна дьахтар киэн туттуута буолара. Номоххо киирбит, кыһыл «луук курдук» иһиттээх «Красная Москва» духуу анал испииһэгинэн эрэ тарҕаталлара. Бастаан маны улахан салайааччылар ойохторо, Любовь Орлова, Валентина Серова курдук киинэ сулустара уонна биллэр үлэһит дьахталлар эрэ ылар кыахтаахтара.

Холобур, 1940 сыллаахха бу духуу сыаната 28 солб. 50 харчы этэ, онтон сэрии кэмигэр сыаната 500 солкуобайга диэри үрдээбитэ! Ол аата орто хамнастааҕар быдан үрдүк этэ.

Күүтүүлээх кырааскалар

Сиигирдэн баран сотуллар кыламан кырааската (тушь), тимир футлярдаах уоһу кырааскалыыр помада, өстүөкүлэ бааҥкалах «Метаморфоза» кириэм… Хаачыстыбалаах косметиканы булар олус уустук этэ. Ол иһин ханнык баҕарар кырааска эбэтэр тыҥырах лааҕа — дьиҥнээх баай курдук сыаналанара.

Ордук Польшаттан кэлбит «Climat» духуу эбэтэр олус сэдэхтик көстөр «Наташа» духуу улахан мааныга туттуллара, маны ылаары дьон уһун уочаракка турара.

Эр дьон нэдиэлэни быһа маҕаһыыннары кэрийэн, тугу эрэ сөбүгэр соҕуһу булаары түбүгүрэллэрэ. Сороҕор баҕарбыттарын буолбакка, туох баарынан бэлэхтииллэрэ. Ол эрэн сэбиэскэй дьахталлар ханнык баҕарар косметикаҕа үөрэллэрэ, тоҕо диэтэххэ хас биирдии тюбик эбэтэр флакон — бу эр киһи болҕомтотун уонна кыһамньытын бэлиэтэ этэ. Бэлэх брендэ буолбакка, суолтата күндү буолара.

Дьиэ кэргэн баайын бэлиэтэ – хурустаал иһи

Күн уотугар оонньуур кырыылаах хурустаал вааза, салат, кэмпиэт иһитэ ордук сыаналанара. Сэбиэскэй Сойууска хурустаал ыал уйгу олохтооҕун, баайын бэлиэтэ буолара. Маннык иһити үлэҕэ туйгуннарга Бочуотунай грамотаны кытта биэрэллэрэ, үбүүөйдэргэ уонна, биллэн турар, кулун тутар 8 күнүгэр бэлэхтииллэрэ. Ордук Чехословакия хурустаала сыаналанара. Эбэлэрбит билигин да улахан бырааһынньыктарга сервант иһиттэн бу иһиттэри таһааран уураллар. Кинилэргэ эдэр саастарын уонна кэргэннэрин туһунан сырдык өйдөбүл.

Туһалаах иһит-хомуос

Сковорода, көстүрүүлэ, өтүүк, электрическэй чайник. Билигин маннык бэлэхтэн ханнык баҕарар дьахтар өһүргэниэн да сөп. Оттон урут итинник буолбатаҕа! Тиэхиньикэ уонна иһит-хомуос дэписсиит этэ, уочарат бөҕөтө буолара. Эр киһи саҥа миксери эбэтэр скороварканы булан аҕаллаҕына, дьахтар дьиҥнээхтик үөрэрэ.

«ЗИЛ» халадыылынньык, «Рига» сууйар массыына, пластинка тыаһатар проигрыватель, феннээх бигуди — ыал киэн туттуута, ыаллыы дьахталлар ымсыырар маллара этэ.

Иистэнэр дьахтарга – таҥас матырыйаала

Таҥас матырыйаалын бэлэхтээһин — саамай күүтүүлээх бэлэхтэртэн биирдэстэрэ. Эр дьон тугу сөбүлүүрүн буолбакка, атыыга туох баарын ылаллара. Кэрэ солко, чаҕылхай сиитэс.
Сэбиэскэй дьахталлар бары кэриэтэ иистэнэллэрэ, онон ханнык баҕарар таҥас саҥа ырбаахыга, былааччыйаҕа кубулуйара. Бэлэм кофталары, былааттары эмиэ бэлэхтииллэрэ. Польшаттан, Чехословакияттан кэлбит таҥас «шик» дэнэрэ. Сороҕор утуйар таҥаһы, соттору биэрэллэрэ. Судургу курдук эрээри, маҕаһыын кураанах кэмигэр бу хаһаайыстыбаҕа олус наадалаах буолара.

Саас бэлиэтэ — сибэкки уонна аккырыыкка

Мимоза, тюльпан, ландыш эбэтэр роза. 8 кулун тутарга сибэкки хайаан да баар буолуохтаах. Эр дьон сарсыарда эрдэ туран сибэккигэ уочараттыыллара. Саһархай мимоза — бырааһынньык сүрүн сибэккитэ этэ. Аккырыыкка туһунан туспа кэпсиэххэ сөп. Ону кичэллээхтик талаллара, итии тыллаах эҕэрдэни илиинэн суруйаллара, буостанан ыыталлара. Билигин бу үгэс сүтэн эрэр эрээри, ол саҕана аккырыыкката суох бырааһынньык туолбат курдуга.

Билигин бырааһынньык атыы-эргиэн бырааһынньыга буолла, бэлэҕи 5 мүнүүтэ иһигэр атыылаһыахха сөп. Ол эрэн, урукку курдук уустуктук, эрэйдэнэн, уочараттаан булбут бэлэх хаһан баҕарар күндү буолара.