Арассыыйаҕа сыл устата 29 киһиэхэ тыатааҕы саба түһэн өлөрбүтэ билиннэ

Арассыыйа үрдүнэн сыл устата 29 киһи аар тайҕа муҥур тойоно саба түһүүтүн сиэртибэтэ буолбут, олортон тоҕуһа — Красноярскай кыраайга. Маннык курус дааннайдары суруналыыстар эрэгийиэннэр дьаһалталарын иһитиннэриилэригэр уонна аһаҕас источниктарга олоҕуран суоттаан таһаардылар.

ТАСС ааҕыныстыба суруйарынан, Красноярскай кыраай быйыл тыатааҕы саба түһүүтүттэн эмсэҕэлээбиттэр уонна өлбүттэр ахсааннарынан саамай үрдүк көрдөрүүлээх, кутталлаах эрэгийиэнинэн буолла.

Холобур, ити иннинэ Красноярскай кыраайга уопуттаах эсэһит Виталий Елфимов тыатааҕыны көрсөн баран тыыннаах хаалбатах. Красноярскай кыраай дьокутаата Елена Пензина кэпсииринэн, Петропавловка дэриэбинэтин олохтооҕун өлүгүн Курагинскай оройуоҥҥа Казыр өрүс үөһээ өттүгэр адьырҕа кыыл тыаҕа  кистээбитин булбуттар. Бу туһунан RT иһитиннэрбитэ.

Ону таһынан, алтынньы 25 күнүн киэһэтигэр эмиэ Красноярскай кыраайга, Карскай байҕал кытылыгар баар «Север» буухтатыгар, үрүҥ эһэ баахтанан үлэлиир киһиэхэ саба түспүтэ биллэр. Эр киһи төбөтүн, саннын уонна илиитин бааһырдыбытын үрдүнэн, эр киһи тыыннаах хаалбыт сонуна тарҕаммыта. Бастакы көмөнү оҥорон баран, кинини балыыһаҕа илдьибиттэр, билигин хирургия отделениетыгар эмтэнэ сытар.

Санатан эттэххэ, Саха сиригэр эмиэ эһэлэр дьоҥҥо тахсар түбэлтэлэрэ элбээбитэ бэлиэтэммитэ. Онон тыаҕа, айылҕаҕа сылдьарга олус сэрэхтээх буолуу ирдэнэр.