Судаарыстыбаннай өҥө үлэһиттэрэбит диэн эмиэ албынныыллар…

Бырааһынньык өрөбүллэрин күннэригэр өрөспүүбүлүкэ полициятыгар түөкүннээһин  туһунан үс иһитиннэрии киирдэ.  Кибераферистар ыгыыларыттан тахсыбыт  хоромньу уопсай суумата 2 мөлүйүөн кэриҥэ буолла.

Мииринэй улууһун 45 саастаах суоппарыгар быраабы араҥаччылыыр уорганнар үлэһиттэрин ааттарыттан эрийбиттэр уонна кирэдьиит ыллараннар, 1 мөлүйүөнтэн тахса солкуобайы уорбуттар.

Нолуок, Росфинмониторинг уонна киин баан «үлэһиттэрэ»  Дьокуускай куорат сыаҕын 39 саастаах маастарын олунньу бүтүүтүттэн албыннаан, кини тус уонна сойуом харчытыттан 640 тыһыынчаны ыыттарбыттар.

Онтон судаарыстыбаннай өҥө уонна киин баан үлэһиттэрэ буолан кубулуммут дьон албыннарыттан 24 саастаах кыыс 243 тыһыынчаттан элбэх үбүн сүтэрдэ.

Саха сирин Ис дьыалаҕа министиэристибэтэ тус чахчыларгытын уонна баан каартатын реквизиттэрин, ол иһигэр смс-иһитиннэриилэртэн кэлбит куодтары, кимиэхэ да эппэккитигэр сүбэлииллэр. Билбэт дьоҥҥут этиитинэн  ханнык да үп эпэрээссийэтин оҥорумаҥ.

СӨ Ис дьыала министиэристибэтин пресс-сулууспата