Полицейскайбын диэн кубулунан, убайын 1,9 мөл. солк. албыннаабыт 

Мэҥэ-Хаҥалас улууһугар холуобунай ирдэбил оперативнига ураты албыннааһын дьыалатын арыйда. Ол түмүгэр кыратыттан куһаҕаннык истэр 27 саастаах олохтоох киһи бэйэтин быраатыгар албыннаппыта билиннэ. 

Барыта кирэдьиит тэрилтэтин салайааччытын үҥсүүтүттэн саҕаламмыт. Кини полицияҕа: «Биир киһи кирэдьиит ылбытын төннөрбөт, албыннааһын бэлиэтэ көстөр», — диэн үҥсүү суруйбут.

Полицейскай бу дьыаланы үөрэтэн баран, кирэдьиити төлөөбөтөх киһи (27 саастаах уол) туох да куһаҕан санаата суоҕун, кини бэйэтэ түөкүннээһин сиэртибэтэ буолбутун тута өйдөөбүт. Уол кэпсииринэн, киниэхэ ханнык эрэ «полиция үлэһитэ» суруйан: «Быраатыҥ алдьархайга түбэстэ, ону быһаарарга харчы наада», — диэн модьуйбут, онон иэс ыларга күһэллибит.

Көрдүүр үлэ түмүгүнэн маннык хартыына арыллыбыт. Быйыл саас Мэҥэ-Хаҥалас олохтооҕор мессенджергэ биллибэт киһи суруйбут. Кини бэйэтин полиция үлэһитэбин диэн кубулуммут уонна быраата алдьархайга түбэспитин, дьыаланы сабарга харчы наадатын эппит.

Убайа куһаҕаннык истэр буолан дьону кытта суругунан эрэ кэпсэтэр, онон эрийэн куолаһын истибэтэх. Онтон 20 саастаах быраата «полицейскай» суруйбутун бигэргэппит, кырдьык сокуону кэспитин эппит. Убайа быраатыгар итэҕэйэн, муус устартан балаҕан ыйыгар диэри араас суумалаах харчыны ыыта олорбут. Барыта холбоон 1,9 мөлүйүөн солк.н тахса харчыны албыннааччыга ыыппыт, ол иһигэр элбэх кирэдьиит ылбыт.

Мэҥэ-Хаҥалас полицейскайа «биллибэт үлэһит» кимин быһаарбыт. Саамай куһаҕана диэн — быраата убайа куһаҕаннык истэрин, харчыта бүппүтүн уонна араас тэрилтэлэртэн иэс ыларын билэ-билэ албынныы олорбут. Билигин 20 саастаах Мэҥэ-Хаҥалас олохтооҕор РФ Холуобунай кодексатын 159 ыстатыйатын 4-с чааһынан («Түөкүннээһин») холуобунай дьыала тэрилиннэ.