ВИДЕО: Аатырбыт тустууктарбыт саҥа талааннара арылынна

Олимпийскай оонньуулар кыттыылаахтара  Павел Пинигин, Александр Иванов уонна аатырбыт тустуук Василий Гоголев туойунан иһит оҥорор сатабылы баһылаатылар. Кинилэр бэйэлэрин илиилэринэн Дмитрий Коркин турнирыгар анаан ураты керамика иһиттэри оҥордулар, өссө тус илии баттааһыннарын хааллардылар диэн «Триумф» успуорт киинин пресс-сулууспата иһитиннэрэр.

Санаттахха, Дмитрий Коркин сырдык аатыгар аналлаах XVIII Норуоттар икки ардыларынааҕы турнир Дьокуускайга сэтинньи 20–21 күннэригэр ыытыллыаҕа.

• Кыттааччылар: 13–15 омук дойдутуттан күүстээх спортсменнар уонна Арассыыйа сүүмэрдэммит хамаандатын бастыҥ тустууктара кэлиэхтэрэ.
• Саха сирин сүүмэрдэммит хамаандата толору састаабынан кыттара күүтүллэр. Көбүөргэ Лев Павлов, Константин Капрынов, Ньургун Сергин, Виктор Яковлев уонна да атын биллэр тустууктар тахсыахтара.

Быйылгы турнир саха аатырбыт тустууктара Павел Пинигин, Роман Дмитриев уонна Александр Иванов 1976 сыллаахха Монреаль куоракка буолбут Олимпийскай оонньууларга кыайбыттара, муҥутуур ситиһиилэрэ 50 сылыгар ананар. Бу бэлиэ түгэн күрэхтэһии суолтатын өссө үрдэтэр уонна Саха сирин хас биирдии тустуугар улахан эппиэтинэһи сүктэрэр.