Түөкүннээһин төлөпүөн нөҥүө эрэ буолбатах…

Урут түөкүттэр диэн, көрдөрөн туран албыннаан харчыны, баайы-дуолу суйдуур эбэтэр былдьаан ылар халабырдьыттары ааттыыллара. Аныгы кэмҥэ  төлөпүөн түөкүттэрэ үөдүйдүлэр. Аны атыынан-тутуунан, дьиэ куортамынан албынныыр түөкүттэр эмиэ элбээн эрэллэр.

Бэйэбит испитигэр эмиэ бааллар

Дойду үрдүнэн күн ахсын 50–70 тыһыынча киһи аҥаардас төлөпүөн түөкүттэригэр түбэһэр, албыннатар. Бу туһунан Сбербаан бырабылыанньатын бэрэссэдээтэлин солбуйааччы Станислав Кузнецов бэлиэтээн турар. Сүүс киһиттэн алта-сэттэ киһи түөкүттэргэ итэҕэйэн, кирэдьииккэ да киирэр, уурумньутун да биэрэр эбит. Сбербаан статистиката көрдөрөрүнэн, дойду олохтооҕун 30%-на билбэт нүөмэрдэрэ эрийдэҕинэ, ылбат буолбут. Оттон 40%-на төлөпүөҥҥэ эппиэттиир. Билигин аны киберполиция, ФСБ, Роскомнадзор үлэһиттэрин аатыттан эрийэн дьону албынныыллар. Тоҕо эрэ түөкүттэр диэн буолла да, ыраах сиргэ олорон төлөпүөн нөҥүө дьон харчытын суйдуу сатыыр эрэ дьону саныыбыт. Оттон түөкүттэр бэйэбит испитигэр эмиэ бааллар. Массыына, дьиэ-уот, уһаайба, ардыгар мал-сал да атыылыыбыт, дьиэ куортамныыбыт диэн дьону албыннаабыт түгэннэрэ элбэхтэр.

Кыбартыыра куортамныыр сэрэхтээх

Урукку сылларга дьон кыбартыыраны куортамныырыгар, хаһаайыны кытта көрсөн күлүүһү тутта да бүтэрэ. Билигин дьон дьиэтин куортамҥа ылан баран туора дьоҥҥо сууккаҕа куортамныыр, оннооҕор албыннаан атыылыыр дьон баар буолбут. Маннык сиэрэ, кэрээнэ суох быһыылары саха дьоно эмиэ оҥороллор эбит.

Сиһилии хаһыат 28 (6524) №-гэр ааҕыҥ.

ХААРТЫСКА: HTTPS://WWW.MAGNIFIC.COM/RU