Дьуһуурунай борокуруор: Киин куоракка эр киһи гарааска уокка сиэппит

Саха сиригэр ааспыт суукка устата 5 буруйу оҥоруу тахсыбыта бэлиэтэннэ.Холуобунай дьыалалары тэрийии уонна процессуальнай бэрэбиэркэлэри ыытыы борокуратуура хонтуруолугар тураллар.

Дьокуускай куоракка биллибэт дьон киһи бааҥҥа баар счетуттан 60 тыһ. солк. уорбуттарын туһунан сайабылыанньа киирбит.

Оттон Мэҥэ Хаҥалас улууһугар сир учаастагын атыылыыбын диэн албыннаан, 1 мөл. 500 тыһ. солк. уоран ылбыттара биллибит.

Уус Алдан улууһугар 350 тыһ. солк. суумалаах социальнай көмө харчытын ылыыга түөкүннээһин чахчытынан холуобунай дьыала тэрилиннэ. Маны таһынан, киин куоракка наркотигы сокуоннайа суох эргиниини тохтоппуттар.

Оттон Ленскэй улууһугар суоппар итирик туруктаах массыынаны иккиһин ыытан иһэрэ бэлиэтэммит.

Киин куоракка Тихонов уулуссатыгар мас гараас умайбыт. Ол түмүгэр 1968 с.т. эр киһи уокка сиэтэн, балыыһаҕа киирбит.

Суукка иһигэр киһи өлүүлээх суол быһылаана тахсыбатах. Ол эрээри, итирик туруктаах массыынаны урууллаан иһэр 6 суоппар тутуллубут.