«Эрэстэрээҥҥэ бомба баар» диэн сымыйалаабыт хара санаалаах хаайылынна

Дьокуускай куорат борокуратуурата 50 саастаах эр киһиэхэ сыһыаннаах холуобунай дьыалаҕа судаарыстыбаннай буруйдааһыны өйөөтө. Кини социальнай эбийиэккэ эстэр тэрил баарын туһунан соруйан сымыйанан биллэрбитин иһин (Арассыыйа ХК 207-с ыст. 2-с чааһа) улахан буруйга тардылынна.

Суут быһаарбытынан, 2025 сыл ахсынньытыгар уорбаланааччы Дьокуускай куорат биир эрэстэрээнигэр итирик туруктаах сылдьан, күлүгээнниир санааттан, тэрилтэ администраторыгар «дьиэҕэ эстэр тэрил (бомба) ууруллубут» диэн сымыйа сонуну эппит.

Бу кутталлаах иһитиннэриини бэрэбиэркэлии тутатына быраабы араҥаччылыыр уорганнар үлэһиттэрэ тиийбиттэр. Дьиэни бүтүннүүтүн бэрэбиэркэлээһин түмүгүнэн туох да эстэр тэрил көстүбэтэх.

Суут, судаарыстыбаннай буруйдааччы ирдэбилин уонна эр киһи урукку сууттаммыт дьыалата уһулла илигин учуоттаан, кинини 3 сылга көҥүлүн быһарга уонна кытаанах эрэсиимнээх көннөрөр холуонньаҕа ыытарга быһаарда. Билиҥҥи туругунан суут бириигэбэрэ сокуоннай күүһүгэр киирэ илик.