Элбэх оҕолоох ийэлэри наҕараадалаатылар

Сааскы сандал бырааһынньык — Дьахталлар аан дойдутааҕы күннэрин иннинэ бырабыыталыстыбаҕа өрөспүүбүлүкэ сайдыытыгар кылааттарын киллэрбит, элбэх оҕолоох ийэлэргэ судаарыстыбаннай наҕараадалары туттардылар.

Кирилиэскэ кадет уолаттар чиккэһэн туран, хас биирдии кэрэ аҥаарга сааскы сибэккини туттаран, эҕэрдэлээн, настарыанньаларын көтөхтүлэр.
Бырабыыталыстыба бэрэссэдээтэлэ Кирилл Бычков ийэлэри истиҥник эҕэрдэлээтэ.
— Ийэлэр сыраларынан, кыһамньыларынан, уҕараабат тапталларынан дьиэ кэргэн тутула бөҕөргүүр. Үгүс кэрэ аҥаардар дьиэ кэргэннэрин уонна үлэлэрин дьүөрэлииллэрэ сөхтөрөр. Бүгүҥҥү күҥҥэ дьахталлар уопсастыбаҕа көмөлөрө, өрөспүүбүлүкэ сайдыытыгар киллэрэр кылааттара сүҥкэн, — диэн эттэ.
7, 8 оҕолоох ийэлэри »Ийэ Албан аата» бэлиэ 1,2,3 истиэпэннээх мэтээллэринэн наҕараадалаатылар.
Маны тэҥэ, өрөспүүбүлүкэ сайдыытыгар эҥкилэ суох үлэлэригэр кылааттарын киллэрбит дьахталларга бырабыыталыстыба, Ил Дархан Махтал суруктарын, бочуоттаах бэлиэлэри туттардылар.
Наҕараадаламмыт ийэлэр ааттарыттан сэттэ оҕолоох Айталаана Алексеева харда тылы эттэ.
— Мин оҕолорбун иитэр сэмэй кылааппын үрдүктүк сыаналаабыттарыгар махтанабын. Хас биирдии ийэ оҕолоро доруобай, дьоллоох, ситиһиилээх, уопсастыбаҕа туһалаах буолуохтарын баҕарар. Оҕолор этэҥҥэ улаатан иһэллэрин, дьоллоох оҕо саастарын көрөр диэн дьол. Онуоха судаарыстыба элбэх оҕолоох дьиэ кэргэттэргэ элбэх көмөнү оҥорор, — диэн эттэ.